فاصل اعلاني

الفقرة الاعلانية
مين منا مشفش اعلانااااااااااااااااااااات
طبعا الاجابة مفيش
لية بقى
لان انت لو فى المريخ التليفزيون هيجبلك اعلانات بردو لحد عندك عشان يرخموا عليك
وزى ما قال المثل ((الاعلانات تدق الباب فى اى وقت))
فلو حضرتك مثلا بتتفرج على مسلسل اوفيلم او حتى البييت بيتك ومطرحك ياباشا
هتلاقى عاصفة من الاعلانات هلة عليك وانت قاعد فى مكانك
شامبو وزيت وماكرونة وجرجير واريال وبرسيل وكل حاجة فى الدنيا وانت قاعد
واكيد طبعا هتنسى انت كنت بتتفرج على اية اساسا
ما انت بقالك ساعة عمال تلف فى دكان بقالة

كنت قاعدة انا ووامى الحبيبة روح قلبى مرة وقولنا تنفرج على مسلسل (لن اعيش فى جلباب ابى) قديم شوية بس مكنش فى حاجة فى التليفزيون ادخلوا بقى فى حياتنا انا وامى
المهم
بنتفرج وبعديها جة فاصل
عاااااااااااااااادى جدا بتحصل
دقيقة التانية خمس دقايق واعلانات بردو وكنا هنام اصلا
يادى النيلة وبعدين ست الكل هتنام منى
المهم فى النص قالتلى (وبعدين بقى عايزين نعرف يحيى ولميس عملوا اية)
يحيى ولميس مين ياست الحبايب اية الى وداكى تركيا دلوقت احنا كنا بنتفرج على فرح بهيرة
كدة كتييييييييييييير

الموضوع بقى مستفز ياجماعة

كل يومين يطلعوا باعلان والاعلانات كترت فى السوق ومش هنعرف نلمها
جت هوجة الاعلانات الى بتتحدى الملل الى جبتلنا اكتئاب نفسى وعصبى وبقينا نقطع فى هدومنا منها وايوة كدة ياويع واكديد مامى نحلة ولا فرخة وقولنا ماااااااشى اهو نصبر وكلة بثوابة


وبعدين يطلع اعلان الزبادى الى الواد فية بيسرق الزبادى من ابوة وينصب على جدة ويتوهة
وقولنا عادى بتحصل ما الحكومة لازم تنمى مهارات الاطفال بردو عشان تعرف تعيش فى البلد دى


وبعدين طلعلنا عم مهند قاعدلنا فى حمام ويطلع يقولك (ممكلة من الجمال) بالعنجليزى والناس مفهمتش الجملة اصلا اكمنة بيقولها بانجليزى م..........ر ومدشدش قولنا عادى ماهو الناس مش مركزة فى الاعلان اساسا دول بيشوفوا مهند
دة غير اعلانات الشبسى ال احمد السقا فيها بيطنطط فى كل حتة فيها وشيبسكو المضلع ولا المكعب الى خلانى اروح السوبر مركت واجيب كل الشيبسيات الموجودة واسيبة كلب على الرف من كتر استفزاز الاعلان


ولا اعلانات السياحة بقى الى تيجى وحدة تقولك (انى لا استطيع ان اعيش بحرية فى هذا البلد) ما عنك ما عشتى ياختى وما تجيش تانى هو احنا بنستفيد منكو حاجة وكل شوية السياحة بتضرب رقم قياسى قياسى مين ؟؟ ما معروف ان الناس الخواجات الهاى ليف دول بيرحوا يقضوا الاجازة فى هولندا وتركيا واسبانيا
يعنى الى بيبجولنا عم جورج القهوجى والست ماريا الى وقفة على عربية الهوت دودج (دة زى الفول عندنا كدة)


عادى عادى عادى جدا كل الى فات دة عاااااااااااااااااادى وبتقبلة عادى جدا بعد ما بشرب كوباية لمون واعصر عليها 4 لمونات ومتقطع فيها حتت لمون


الى جاى دة بقى الى بيجلينى نفسى ا..........ر التلفاز بتاعنا لولا ان رهنينة على غطا ازارة بيبسى والغطا مش معانا عشان طلع فية 6 دقايق مجانية ففى واحد طمع فية


المهم
الاعلان عبارة عن
عيل صغير غتت ورخم وثقيل(بس شكلة ابن ناس كدة)
طالعلك من المية مش عارفة هى مش بحر ولا ترعة هو بعد ما سألت قالولى دة بسين
الواد طالع بقى من البسين دة ومبسوط اوى اوى اوى يعنى مبسوط لية مش عارفة
المهم الواد طلع وقال(انا بحب الصيف عشان بعوم فى البسين دة)

وبعدين تيجى ست تانية (بردو شكلها بنت ناس)
تقول(انا بحب الصيف عشان بشترى من المول كل الى عيزاة)

وبعدين يجى راجل طويل عريض ماسك عصايا وتحت منة حتة كورة اد كدة مش شيفها اساسا
ال بيلعب جولف ويقول (انا بحب الصيف عشان بلعب جولف جنب الفيلا الفظيعة بتاعتى)

وبعدين الاعلان بيخلص على ان الناس تروح جرى عشان تشترى شقة فى المدينة الرهيبة الفظيعة دى ولا فيلا
بمقدم صغنن خالص وهو واحد وجنبة اصفاااااااااار كتير معدتش بصراحة وبعدين الاعلان يخلص
............................................................
احم هو فى اية بقى
هى الحكومة بتاعتنا دى بتاعتنا بتاعتنا ولا عايشة فى بلد تانية ولا هما بيشتغلوا فى الشتا بس والصيف بيحكوموا بلد اخرى

فيلل اية وجولف اية وبسين اية

دة البت تفضل تعيط لابوها عشان يخدها مصيف والراجل يقولها منين اجيب منين
وفين وفين بعد ما يستلف من طوب الارض يطلعوا على جمصة ولا راس البر ويفكلها عجلة كاوتش اتوبيس العتبة وامها تفكلها بلوزها وتعملهلها مايو ويلا بينا
بسين اية يقى دة


و الراجل بيفضل واقف 5 ساعات فى طابور العيش عشان يطلعلوا برغيفين ولا حاجة
ودة وقفلى ماسك عصايا وتحتية كورة قد البيضة وعايز ينزلها فى حفرة


والست الى راحة المول دة طب ما تجيبوا الستات الى وقفين فى طوابير الجامعيات عشان يطلعوا بفرخة ولا حاجة ولا تشوف الستات الى بتعيط عشان ازازة الزيت بقت ب 11 جنية


دة اية الشلل دة
بجد هيافة ولا اروع
يعنى انا اقصد بما ان الاعلانات دى مش لينا فيها فبلاش منها
يعملوا اعلانات تانية تخاطب الشعب المصرى الى بجد
عشان بس متحصلش فتن فى البلد
يعنى يرضيكو الناس الى معندهاش بسين تنفس من الناس الى عندها بسين
بلاش كدة
وانا من موقعى هذا اقترح
ان انا الى اعملكوا حملة الاعلانات الى جاية
وكلها هدفة
هعمل اعلان جديد واقول فية

(( انابكرة الصيف عشان معنديش بسين والواد دة عندة بسين))
((انا بكرة الصيف عشان الراجل بتاع المصلحة الحكومية بيبقى مخنوق من نفسة ومش بيرضى يخلصلى الورق))
((انا بكرة الصيف عشان الدنيا بتبقى حر وببقى مخنوقة من اى حد وامشوا من قدامى دلوقت))
((انا بكرة الصيف عشان الموصلات بتبقى زحمة وخنقة وحنا بنقعد اربعات اهئ))

انضم لحملة انا بكرة الصيف ت..........ب 4 دقايق مجانية من شركة ام نبيل